Connect with us
Kapilvast Forest

कर्मचारीलाई १५ दिन बढी फाजिलमा राख्न नपाइने

२०७६, १८ असार बुधबारमा प्रकाशित

१८ असार, काठमाडौं । निजामती कर्मचारीलाई अतिरिक्त समूह (फाजिल)मा १५ दिन बढी राख्न नपाइने भएको छ । राज्य व्यवस्था तथा सुशासन समितिले संघीय निजामती सेवासम्बन्धी विधेयकमा निजामती कर्मचारीलाई जिम्मेवारी नदिई पन्ध्र दिन भन्दा बढी राख्न नपाइने व्यवस्था राख्ने सहमति जुटाएको हो ।

संघीय मामिला तथा सामान्य प्रशासन मन्त्रालयले विधेयकमा फाजिलमा ६० दिनसम्म राख्न सकिने प्रसताव गरेको थियो । सांसदहरुले एक महिना, १५ दिन, ७ दिनमा झानुपर्ने संशोधन हालेका थिए । बुधबार भएको छलफलमा सामान्य प्रशासनमन्त्री लालबाबु पण्डितले १५ दिनभन्दा बढी फाजिलमा राख्न नहुने व्यवस्था गर्न सकिने बताएपछि समितिले त्यही अनुसार निर्णय गरेको हो ।

‘हाजिर गरेर घाम ताप्न दिइन्न’

मन्त्री पण्डितले आफू पहिलोपटक सामान्य प्रशासनमन्त्री हुँदा साढे चार सय निजामती कर्मचारी फाजिलमा रहेको सुनाए । ‘मैले त्यो पुरै रित्याइदिन भनेँ’, उनले भने, ‘अतिरिक्त भनेको हाजिर गरेर घाम ताप्ने ? यसमा म आफैं संवेदनशील छु । कहिलेकाहीँ केही ब्यवहारिक समस्या पनि पर्छ तर, अब पहिले जस्तो हुन दिइन्न ।’

कर्मचारीलाई पन्ध्र दिन भन्दा बढी जिम्मेवारी नदिई राखेमा सम्बन्धित कर्मचारीलाई विभागीय कारबाही हुनेछ । ‘कुनै निजामती कर्मचारीलाई पदीय जिम्मेवारी नदिई राखेमा जिम्मेवारी दिई काममा लगाउनुपर्ने दायित्व भएको पदाधिकारीलाई विभागीय कारबाही हुनेछ’ विधेयकको दफा १७ को उपदफा ३ मा उल्लेख गरिएको छ । विधेयकको यो दफा परिमार्जनसहित पास भएको छ ।

बैठकमा सामान्य प्रशासन मन्त्रालयका सचिव यादव कोइरालाले कर्मचारीलाई काजमा खटाउन सकिने व्यवस्थालाई भने यो व्यवस्था (कर्मचारीलाई १५ दिनभन्दा बढी फाजिलमा राख्न नपाइने) ले प्रभावित नपार्ने प्रष्ट्याए ।

एक बर्ष परीक्षणकाल

निजामती सेवामा नियुक्ति गर्दा कर्मचारीलाई एक बर्ष परीक्षणकालका रुपमा राखिनेछ । ‘निजामती सेवाको पदमा नियुक्ति एक बर्ष परीक्षणकालमा रहने गरी गरिनेछ’ विधेयकको दफा १८ को उपदफा १ मा उल्लेख छ ।

परीक्षणकालमा काम सन्तोषजनक काम गर्न नसके त्यस्ता कर्मचारीको नियुक्ति बदर हुन सक्छ ।

परीक्षणकालमा रहेका कर्मचारीहरु विगतमा आपराधिक गतिविधिमा संलग्न भएको, सजाय पाएर फरार रहेको जस्ता विषयमा विषयमा अध्ययन गर्नुपर्ने र त्यस्तो पाइए नियुक्ति बदर हुने भनेर राख्नुपर्ने प्रस्ताव नेकपाका सांसद झपट रावलले गरेका थिए ।

तर, मन्त्रालयका सचिव कोइरालाले विगतमा गलत काम गरेको र ढाँटेर जागिरमा प्रवेश गरेको पाइए स्वतः कारबाही हुने भएकाले यहि दफामा राख्न आवश्यक नरहेको बताए । परिक्षणकालमा नियुक्ति बदर नभएमा त्यस्ता कर्मचारीको नियुक्ति स्वतः सदर भएको मानिने छ भने एक पटक परीक्षणकाल पुरा गरेका कर्मचारीलाई पुनः परीक्षणकालमा नराखिने विधेयकमा उल्लेख छ ।

सांसदहरुले निजामती सेवामा रहेका कर्मचारीले खुला प्रतिस्प्रधामार्फत अर्को पदमा जिम्मेवारी पाएको खण्डमा पुनः परीक्षणकाल राख्नुपर्ने मत पनि राखेका थिए ।

तर, एक पटक परीक्षणकाल पुरा गरिसकेपछि निजामती कर्मचारी निरन्तर कानुनको दायरामा रहने भएकाले पुनः परीक्षणकाल आवश्यक नरहेको मन्त्रालयका सचिव कोइरालाले बताए । सचिव कोइरालाको भनाइमा समिति सहमत भयो र सोही अनुसार निर्णय गर ।

मुख्य सचिवको पदावधिमा मत बाझियो

मुख्य सचिव र न्याय सेवाको मुख्य रजिष्टारको पदावधि ३ बर्ष, विशिष्ट श्रेणीको सचिव वा सो सरहको पदको पदावधि ५ बर्षको हुने प्रस्तावित व्यवस्था छ ।

यसबारे भने सांसदहरुको मत बाझियो ।

नेकपाका सांसदहरु जनार्दन शर्मा, पम्फा भुसाल, झपट रावल, महेश्वरजंग गहतराज, नवराज सिलवालले मुख्य सचिवको पदावधि २ बर्ष राख्नुपर्ने र कार्यसम्पादन मुल्याङ्कनका आधारमा एक बर्ष थप्न सकिने व्यवस्था गर्नुपर्ने बताए । कांग्रेस सांसद दिलेन्द्र बडू र मिना पाण्डेले त्यसो गर्दा कर्मचारीले ढुक्कले काम गर्न नसक्ने तर्क गर्दै प्रस्तावित व्यवस्था नै उचित रहेको बताए ।

जवाफमा समान्य प्रशासनमन्त्री पण्डितले गलत काम गरेको वा कार्यसम्पादन उचित नरहेको अवस्थामा कारबाही गर्ने अन्य व्यवस्था रहेको भन्दै प्रस्तावित व्यवस्था उचित रहेको बताए । मन्त्रालयका सचिव कोइरालाले कार्यसम्पादन मुल्याङ्कनका आधारमा पदावधि थप्ने व्यवस्था विगतमा अभ्यास गरिसकेको र त्यसले राम्रो प्रतिफल दिन नसकेको उल्लेख गरे । यसबारे अर्को बैठकमा थप छलफल हुनेछ ।

Credit : रघुनाथ बजगाईं रासस

Vijay Steel Galaxy Crusher Chandrauta Kapilvastu Shivaraj
Advertisement Agriculture Development Bank Bahubali Cement
Advertisement Siddhartha Education Consultancy Chandrauta Kapilvastu Sadak Division Shivaraj Chandrauta Kapilvastu Shivaraj Chandrauta Kapilvastu Shivaraj Chandrauta Kapilvastu Bikar Etta Udhyog Kapilvastu: न्यु ज्याेति ईट्टा उद्योगको उत्कृष्ट ईट्टा,