Connect with us
Kapilvast Forest

गुरू सम्मानकाे पर्व गुरू पूर्णिमा

२०७६, ३१ असार मंगलवारमा प्रकाशित

काठमाडौं । आज गुरुपूर्णिमा पर्व । आफूलाई शिक्षा र दीक्षा दिने गुरुको सम्मान गरी यो पर्व मनाइँदै छ । हरेक वर्ष आषाढ शुक्ल पूर्णिमाका दिन यो पर्व मनाइन्छ ।

गुरु शब्दमा गु को अर्थ अन्धकार र रु को अर्थ उज्यालो हुने उपनिषद्मा उल्लेख छ । गुरु कृपाले शिष्यलाई अज्ञानताको अन्धकारबाट ज्ञानको उज्यालोतर्फ अघि बढ्न बाटो देखाउँछ । गुरुबाटै शिष्यलाई प्राप्त ज्ञानले सत्य र असत्य छुट्टयाउन प्रेरणा दिने भएकाले गुरुको सम्मान गरिन्छ । पूर्वीय समाजमा गुरुलाई ब्रह्मा, विष्णु र महेश्वरका साथै साक्षात परब्रह्म मान्ने गरिन्छ । वैदिक शिक्षाले माता, पिता र गुरुलाई देवताका रुपमा सम्मान गर्न सिकाउँदै आचार्य देवो भवः भनेको छ । प्राचीन गुरुकुल शिक्षादेखि शुरु भएको गुरु–शिष्य परम्पराले गुरुप्रति विनयी भई पूर्ण ज्ञान पाउने पात्र बन्न सिकाएको छ ।

गुरु सम्मानको यो परम्परा हिन्दु, बौद्ध, शिख, ताओ लगायतका धर्मसंस्कृतिका साथै वर्तमान शिक्षामा पनि विद्यमान छ । यही परम्परालाई आत्मसात गरी यस दिन विद्यालय, विश्वविद्यालय र शैक्षिक प्रतिष्ठानहरुमा गुरुको पूजा गरी सम्मान गरिंदै छ । संगीतकर्मी, खेलाडी, अभिनयकला, यन्त्रशालालगायतका क्षेत्रमा पनि गुरुको सम्मानमा विभिन्न कार्यक्रमको आयोजना गरिएको छ ।

आजै वेदव्यासको जन्मदिन परेकाले व्यासपूजा पनि गरिंदैछ । गुरु व्यास तनहुँ जिल्लाको मादी र सेतीनदी संगमस्थल दमौलीमा जन्मनु भएको मानिन्छ । समग्र वेदलाई विषयवस्तुको आधारमा ऋग्वेद, सामवेद, यजुर्वेद र अथर्व वेदमा विभाजन गर्नु भएकाले उहाँलाई वेदव्यास भनिएको हो । वेदव्यासकृत विश्वको सबैभन्दा विशाल महाकाव्य महाभारतलाई पाँचौ वेद भन्ने गरिन्छ । उपनिषद्को सारलाई महाभारत महाकाव्यमा भगवत् गीताको रुपमा राख्नुका साथै वेदव्यासले सम्पूर्ण वैदिक ग्रन्थको ज्ञानलाई ब्रह्मसूत्रको रुपमा प्रस्तुत गर्नुभएको छ ।

आज राति नेपाली भूमिबाट खण्डग्रास चन्द्रग्रण देखिंदैछ । राति १ बजेर ४६ मिनेटमा ग्रहणले चन्द्रमालाई छुनेछ । बिहान ४ बजेर ४५ जाँदासम्म लाग्ने ग्रहणले २ घण्टा ५९ मिनेटसम्म चन्द्रमालाई छेक्नेछ । नाङ्गो आँखाले ग्रहण हेर्न नहुने र विशेष खालको चश्मा लगाई दूरदर्शक यन्त्रबाट ग्रहणबारे अध्ययन गर्न सकिने विज्ञहरुको सुझाव छ ।

Vijay Steel Galaxy Crusher Chandrauta Kapilvastu Shivaraj
Advertisement Agriculture Development Bank Bahubali Cement
Advertisement Siddhartha Education Consultancy Chandrauta Kapilvastu Sadak Division Shivaraj Chandrauta Kapilvastu Shivaraj Chandrauta Kapilvastu Shivaraj Chandrauta Kapilvastu Bikar Etta Udhyog Kapilvastu: न्यु ज्याेति ईट्टा उद्योगको उत्कृष्ट ईट्टा,