‘नागरिक सुस्त भए, सरकार पनि सुस्त हुन्छ’
काठमाडौं । पूर्व प्रधानमन्त्री तथा नेकपाका वरिष्ठ नेता माधवकुमार नेपालले देशको विकासको निम्ति सबै एक जुट हुन आह्वान गर्नुभएको छ । ‘नागरिक सुस्त भए, सरकार पनि सुस्त हुन्छ’ शनिबार आयोजित कार्यक्रममा उहाँले भन्नुभयो, ‘विकासमा संघ, प्रदेश र स्थानीय तहको मुख्य भूमिका हुन्छ । काम सानो होस् या ठूलो त्यसमा ३ वटै पक्षको भूमिका रहन्छ ।’
पूर्व प्रधानमन्त्री नेपालले ३ तहकै समन्वयमा मात्र मुलुकको विकास अघि बढ्ने उल्लेख गर्नुभयो । ‘जनताको अपेक्षा धेरै छन्, सरकारले सबै समस्या समाधमन गर्नूपर्ने अवस्था छ’ उहाँले भन्नुभयो, ‘३ तहको सरकारको हातेमालोबाट मात्र जनताका समस्या समाधान हुन्छ । ३ वटै पक्षबीच समन्वय नगरी विकास संभव छैन ।’
वरिष्ठ नेता नेताले सानातिना काम स्थानीय तहबाटै हुनुपर्ने उल्लेख गर्नुभयो । ‘हामी कहाँ सानोतिनो कामको लागि पनि केन्द्रको मुख ताक्ने प्रवृति छ, अब त्यस्तो प्रवृति अन्त्य गर्नुपर्छ’ उहाँले भन्नुभयो, ‘सडकको खाल्डाखुल्डी पुर्न र धुलोहिलो हटाउन केन्द्रको मुख तान्नु पर्दैन । त्यो काम स्थानीय तहले गर्न सक्छ । सडकको खाल्डाखुल्डी पुर्न र धुलोहिलो हटाउने कार्य केन्द्रीय सरकारले गरिदेला कि भनेर कुर्न उचित होइन ।’
