प्रधानमन्त्रीलाई स्वस्थ देखेर खुशीले प्रश्नै बिर्सेछु: रिजाल
काठमाडौं । प्रमुख प्रतिपक्षी नेपाली कांग्रेसका सांसद डा मिनेन्द्र रिजालले सरकार संचालनको परीक्षामा प्रधानमन्त्री असफल भएको बताउनुभएको छ । प्रतिनिधिसभाको आइतबारको बैठकको बिशेष समयमा उहाँले सरकारले संसदसँग गरेको कार्यसम्पादन करार पूरा गर्न नसकेको बताउनुभएको हो ।
रिजालले बजेट कार्यान्वयन सरकारले संसदसँग गरेको कार्यसम्पादन भएको भन्दै त्यो पूरा हुन नसके प्रधानमन्त्री असफल हुने तर्क गर्नुभयो । ‘प्रधानमन्त्री ज्यू, तपाईले मन्त्रीसँग गरेको कार्यसम्पादन करारका बारेमा त औला उठाउनुहोला, मन्त्री फेर्नुहोला, तर जनताले प्रधानमन्त्रीसंग गरेको कार्यसम्पादन करार खै ?’ उहाँले भन्नुभयो, ‘हिजो जनताले निर्वाचनमा गरेको कार्यसम्पादन करार पूरा भएन प्रधानमन्त्री ज्यू । त्यतिमात्रै होइन संसदले गरेको थियो । कार्यसम्पादन करार अघिल्लो वर्ष । बजेट कार्य सम्पादन करार हो । संसद र सरकारको । पूरा गर्न सक्नुभएन प्रधानमन्त्री ज्यू । यो परीक्षामा असफल भइ सक्नुभयो । आउने दिन सफलता प्राप्त होस् शुभकामना व्यक्त गर्छु ।’
एक बर्षमै जहाज र रेलको सपना देखाउने सरकार तिथि मिति तोकेर सत्तापक्षले निम्ता गरेको स्मरण गराउदै उहाँले अहिले भने आधार वर्ष भनेर आर्थिक वृद्धिको बारेमा हल्का टिप्पणी नगर्न प्रधानमन्त्रीलाई सचेत गराउनुभयो ।
लोकतन्त्रका लागि सरकार नलडेको र प्रजातन्त्रका लागि लडेकाहरुले सरकार बनाएको दाबी गर्दे उहाँले एक पल्टको लडाईले जीवनभरी जे पनि गर्न अनुमति नदिने भन्दै लोकतान्त्रिक आचरण देखाउन प्रधानमन्त्रीको ध्यानाकर्षण गराउनुभयो । प्रधानमन्त्रीले आफ्नो सम्बोधन मा अर्को चुनाव नभएसम्म सरकार नफेरिने भन्दै सडकमा सरकार उल्टाउने सपन नदेख्न गरेको आग्रहका सम्बन्धमा टिप्पणी गर्दे सांसद रिजालले अर्को चुनावपछि नेपाली कांग्रेसको सरकार बन्ने बताउनुभयो ।
‘प्रधानमन्त्रीले भन्नुभयो अर्को चुनाव नभएसम्म यही सरकार रहन्छ । ठिक हो प्रधानमन्त्री ज्यू, यस्तो काम देखेपछि त अर्को पल्ट कांग्रेस बाहेक अरु कसको सरकार बन्छ ?’ उहाँले भन्नुभयो, ‘यसपल्ट त यही सरकार भन्दा तरंग सत्तामा गयो गएन मलाई थाहा छैन । शुभकामना छ सत्ता भित्रै कोही तरंगित नभएको होस् ।’