Connect with us
Kapilvast Forest

शिक्षक नारायण खनालको “मेलै सिकाउन नसकेको गणित” कविता

२०७६, ५ कार्तिक मंगलवारमा प्रकाशित

 

कान्छा !

तिमी सानो छँदा तिम्रा हात छोपेर

धर्का तान्दै अंक लेख्न सिकाएँ मैले ?

अंकको पर्याय मान सिकाउन

फूल ,गुच्छा ,मुसा र बिरालाका चित्र बनाइदिन्थें

तारा र फूलहरूले

तिम्रा अंकहरूलाई पुरस्कृत गर्थें

कान्छा !

 

तिमीलाई सहजै सिकाउन सकिन्थ्यो गणित जोड, घटाउ,गुणन, भाग मात्रै होइन विजगणित,ज्यामिति त्रिकोणमिति,

सम्भाव्यता निरन्तरता र टेस्टहरू

सजिलै सिक्थ्यौ

कति बारूद छ

कान्छो

भन्नुहुन्थ्यो ,सरहरूले

स्नातकोत्तर सम्म नै

प्रथम श्रेणीमा पासगरेर,

आफ्नो सरको इज्जत

राखिदिएकोमा बधाई तथा धन्यवाद छ

कान्छा!

तर कान्छा आजभोलि

तिमी लखर ,लखर हिंडेको देख्छु

मरू भेट्न उतै जाँदै छौ रे

तिम्रा प्रमाणपत्रको चाङ बोकेर

तिम्रो आमाले

आँसुको झरना बगाउँदै

नोकरीको भिख माग्दै

भौंतारिरहेको देखेर

म लज्जित छु

कान्छा !

प्रश्न गर्दै छु आफैसँग किन ?

मैले सिकाईको गणितले

जीवन जीविकामा सहयोग गर्न सकेन

गणितका अंकहरू त

जोडिए तर प्रगति जोडिएन

कान्छा !

प्रगति गुणन हुँदै,

जानुपर्नेमा खुसी भाग लागेर

शुन्य पर्यायहुंदैछ

कान्छा !

संसारका गणित शिक्षकले

समाजको प्रगतिमा

कस्ता गणितीय शुत्र सिकाए

कुन्नि तर

मेरा गणितका शुत्रले

अल्फा,बेटा र गामालाई त खुसी दिए होलान् तर

वास्तविक जीवनमा

प्रमाणपत्र बाहेक

केही दिन सकेनन् कान्छा !

श्रमिकको गाँस,बाँस र कपास

खोजीदिन विरामिको

अौषधिको चक्कि बनिदिन

मेरो गणितले सिकाउन सकेन कान्छा !

न त मेरो गणितले खुसी नाप्न,

सुख अनन्त बनाउन र प्रेम तौलन सक्यो

न घृणालाई खुम्च्याउन सक्यो

न अपराधीको अपराधीक मानसिकता

शुन्यले गुणा गर्न सिकाउन सक्यो

तर कान्छा ! लोभि ,पापी र ब्यभिचारीले

आफ्ना कृयाकलाप गुणन गर्न जाने

तर मैले घटाएर शुन्य पार्न सकिन कान्छा !

जीवन जिउने गतिलो

शुत्र सिकाउन सकेको भए

मेरा सबै विद्यार्थीले

सुखको जीवन जिउँदा हुन

राष्ट्रको समृद्धिमा सरिक हुँदा हुन

मेरो गणितले दु:खका

आँसुको आयतन निकाल्न र खुसीको

क्षेत्रफलबढाउन सिकाउन सकेन

प्रगति र दुर्गतिका

रेखा प्रतिच्छेदन हुने र समानान्तर हुने

शुत्र दिन सकेन विजगणितका अमुर्त शुत्र

चेतना र संघर्षमा

सामाजिक प्रगतिमा नैतिक शिक्षामा,

अनुशासनमा सधै अमुर्त रहे कान्छा !

ज्यामितिमा रचना त सिकाएँ

तर राष्ट्रको प्रगति गर्ने र स्वाभिमानको

शिर ठाडो पार्ने जुक्ति

लगाउने शुत्र सिकाउन सकिन कान्छा !

ट्रुथ टेबल सिकाएँ

तर झुटो समाजलाई

सत्यको रापले सेक्ने

शुत्र दिन सकिन कान्छा !

केवल गणितीय शुत्र र गणितको निम्ति

गणित त सिकाएँ

तर सेवा र श्रमको महत्त्व निकाल्ने

जनताको न्यायिक राज्य स्थापना गर्न

आम जनतालाई एकताको मालामा गाँस्ने,

मानवियता फुलाउँदै जाने र आत्मियता

जोड्दै जाने शुत्र सिकाउन सकिन कान्छा !

एक्स र वाइका मानहरू

प्रतिस्थापन गर्न त सिकाएँ

तर असत्यलाई सत्यले अन्यायलाई

न्यायले दुखलाई

सुखले र गुलामीपनलाई

स्वाभिमानले प्रतिस्थापन गर्न

सिकाउन सकिन कान्छा !

गणितको इतिहास सँगै

मानव जातिको जीवन फुलाउन

राष्ट्रको मुहार फेर्ने

श्री वृद्धिको शुत्र दिन

दुख घटाउन र सुख जोड्न सिकाउन सकिन कान्छा !

जीवन समृद्धिको, मानवीयताको

समानताको र न्यायको रथ उचालेर

आकाशमा उड्न सिकाउन सकिन कान्छा !

गणित ,गणितको निम्ति सिकाएँ

तर जीवनको निम्ति सिकाउन सकिन कान्छा !

जीवनको निम्ति सिकाउन सकिन

जनता र राष्ट्रको उन्नतिका निम्ति सिकाउन सकिन ।

Vijay Steel Galaxy Crusher Chandrauta Kapilvastu Shivaraj
Advertisement
Advertisement Banganga
Advertisement Siddhartha Education Consultancy Chandrauta Kapilvastu Sadak Division Shivaraj Chandrauta Kapilvastu Shivaraj Chandrauta Kapilvastu Shivaraj Chandrauta Kapilvastu