औषधि पसलको अनुगमनमा कडाइ
सरकारले औषधि पसलको अनुगमनमा कडाइ गर्ने भएको छ ।
स्वास्थ्य तथा जनसंख्या राज्यमन्त्री डा. सुरेन्द्रकुमार यादवले चिकित्सकको प्रेसक्रिप्सनविना नै औषधि बिक्री वितरणको काम भइरहेको उल्लेख गर्दै औषधि पसलको अनुगमनको काममा कडाइ गर्न लागिएको बताउनु भएको हो ।
‘वल्ड फर्मासिष्ट डे’ को अवसर पारेर बुधबार काठमाडौंमा आयोजित एक कार्यक्रममा बोल्दै उहाँले औषधि पसलको अनुगमन तथा त्यसका सामग्रीहरुको व्यवस्थापनका लागि सरकारले छुट्टै महाशाखा स्थापना गर्ने तयारी गरिरहेको बताउनुभयो । औषधि पसलहरुको अनुगमनको काम संघीय सरकार आफैंले गर्ने संवैधानिक व्यवस्था रहेको उल्लेख गर्दै जिम्मेवारीबाट पन्छिन् नमिल्ने पनि राज्यमन्त्री यादवको भनाइ थियो ।
राज्यमन्त्री यादवले औषधि पसलहरुको अनुगमनमा उद्योग मन्त्रालय र अर्थ मन्त्रालयबाट आवश्यक सहयोग पाउन नसकेको गुनासो पनि गर्नु भयो ।