उत्पादनको आधारमा किसानलाई अनुदान
पाल्पा । रिब्दीकोट गाउँपालिकाले उत्पादनको आधारमा किसानलाई अनुदान वितरण कार्यको सुरुवात गरेको छ । पछिल्लो समयमा घट्दो कृषिको आकर्षणलाई वृद्धि गर्न अनुदान वितरण कार्यक्रम ल्याइएको हो । १ सय ९८ जना दुग्ध उत्पादक किसानलाई १ लाख १३ हजार रुपैयाँ वितरण गरिएको छ । गाउँपालिकालाई दुग्धजन्य पदार्थमा आत्मनिर्भर बनाउने उद्देश्यले दुग्ध सहकारी मार्फत् दूध बेच्ने र नगद अनुदान वितरण गर्ने व्यवस्था गरिएबमोजिम अनुदान दिइएको हो ।
गाउँपालिकाले आर्थिक वर्ष २०७६/०७७ को नीति तथा कार्यक्रममा पशुपालन व्यवसायमा थप अनुदान दिने योजना अगाडि सारेको छ । उत्पादनलाई आधार बनाएर गाउँपालिकाले किसानलाई अनुदान दिएसँगै उनीहरु उत्साहित भएका छन् ।
कृषकलाई आत्मनिर्भर बनाउन स्थानीय सरकारले तदारुकता देखाउन शुरू गरेकाे छ ।
