महिला भलिबल : आज नेपाल र माल्दिभ्स भिड्दै
काठमाडौं । एसियन भलिबल कन्फेडेरेसन (एभिसी) सेन्ट्रल जोन सिनियर महिला भलिबल च्याम्पियनसिपमा आज नेपाल र माल्दिभ्स भिड्दै छन् ।
एक खेल अगावै फाइनल पुगेका दुवै टोलीले समुह चरणको अन्तिम खेलमा भिड्न लागेका हुन् । ढाकाको शहीद सुहरावर्दी ईन्डोर स्टेडियममा हुने खेल स्थानीय समयअनुसार पौने २ बजे सुरु हुनेछ ।
सुरुवाती तीन खेलमा प्रभावशाली जित निकालेको नेपालले बलियो प्रतिद्वन्दीका रुपमा रहेको माल्दिभ्ससँग खेल्न लागेको हो ।
नेपालले सुरुवाती खेलमा अफगानिस्तान, कीर्गिस्तान र बंगलादेशलाई सोझो सेटमा हराउँदै फाइनल यात्रा तय गरेको हो ।
राउण्ड रोबिन लिगको आधारमा सञ्चालन हुने प्रतियोगिताका शीर्ष दुई टिम उपाधिका लागि प्रतिस्पर्धा गर्नेछन् । यसअघि हिजो भएको बंगलादेशलाई ३–० को सोझो सेटमा पराजित गर्दै नेपाल एक खेल अगाबै उपाधि नजिक पुगेको हो ।
शहीद सुहरावर्दी इन्डोर स्टेडियममा भएको खेलमा नेपालले बंगलादेशलाई २५/७, २५/६ र २५/६ को सेटले पराजित गरेको हो ।
