भारतमा आन्दोलन चर्किँदा विदेशी भ्रमण स्थगित
नयाँदिल्ली : भारतले नागरिकता विधेयक पारित गरेपछि उत्पन्न विरोधसँगै कुटनीतिक दबाव पनि झेल्नु परेको छ ।
बंगलादेशका गृहमन्त्रीले हालै भारत भ्रमण स्थगित गरेका छन् । जापानी प्रधानमन्त्री सिन्जो आबेले भ्रमण स्थगित गरेसँगै बंगलादेशी गृहमन्त्री आसादुज्जमन खानले भ्रमण स्थगित गरेका हुन् ।
भारत सरकारले विवादास्पद नागरिकता विधेयक लोकसभा र राज्यसभाबाट पारित गरेपछि आसाममा आन्दोलन चर्किएको छ ।
जापानी प्रधानमन्त्रीले सोही आन्दोलनको कारण देखाउँदै आफ्नो भ्रमण स्थगित गरेका थिए । सँगै बंगलादेशले पनि स्थगित गरेको हो । बंगलादेश सरकारका प्रवक्ता शरिफ महमुद ओपुले ‘आकस्मिक कारण’ देखाउँदै भ्रमण स्थगित भएको जानकारी गराएका हुन् ।
बंगलादेशी परराष्ट्रमन्त्री एके अब्दुल मोमेनले पनि यसअघि नै भारत भ्रमण स्थगित गरेका थिए । मोमेनको भ्रमण स्थगित भएको भोलिपल्टै गृहमन्त्रीको पनि भ्रमण स्थगित भएको हो ।
नयाँदिल्लीमा उनले भारतीय समकक्षीसँग भेटवार्ता गर्ने कार्यतालिका थियो । भारतीय विदेश मन्त्रालयका प्रवक्ता रविस कुमारले भ्रमण स्थगित भएको बारे सामाजिक सञ्जाल मार्फत पनि जानकारी गराएका छन् ।
