‘ट्रम्पविरुद्धको महाभियोग इतिहासकै सबैभन्दा अन्यायपूर्ण’
युएसए । अमेरिकी राष्ट्रपति डोनाल्ड ट्रम्पविरुद्धको महाभियोग इतिहासकै सबैभन्दा हतारमा गरिएको र अन्यायपूर्ण रहेको सिनेटका रिपब्लिकन तर्फका नेता मिच म्याकोनेलले बताएका छन्।
डेमोक्रेटले नेतृत्व गरेको तल्लो सदन प्रतिनिधिसभाले, पक्षपातपूर्ण आक्रोश पोख्दा त्यसले भविष्यका लागि एउटा विषाक्त उदाहरण बनाएको उनले बताए । बुधवार अमेरिकी संसद्को तल्लो सदनले ट्रम्पमाथि लागेका दुवैवटा आरोपमा उनलाई महाभियोग लगाउने पक्षमा बहुमत दिएको थियो । राष्ट्रपतिले आफ्नो शक्तिको दुरुपयोग गरेको र सन् २०२० मा हुने मतदानमा पुनः निर्वाचित हुने सम्भावना बलियो बनाउनका लागि युक्रेनसँग अनुचित तरिकाले सहायता मागेको आरोप उनीमाथि लागेको थियो । ट्रम्पले अब त्यसबारेको सुनुवाइको सामना माथिल्लो सदनमा गर्नु पर्नेछ । सिनेटमा रिपब्लिकनहरूको बाहुल्यता रहेकाले उनलाई शक्तिबाट हटाइने सम्भावना भने छैन ।
तल्लो सदनका करिब सबै डेमोक्रेटले अभियोगको पक्षमा मतदान गरेका थिए भने रिपब्लिकनले त्यसको विपक्षमा मत दिएका थिए।
