माधव नेपाल समूहसँगको छलफल सकारात्मक : प्रदीप ज्ञवाली
काठमाडौं – नेकपा एमालेका सचिव प्रदीप ज्ञवालीले पार्टी अध्यक्ष केपी शर्मा ओली समूह र वरिष्ठ नेता माधवकुमार नेपाल समूहबीचको भेटवार्ता सकारात्मक रहेको बताउनु भचएको छ ।
‘निश्कर्षमा नपुगे पनि, सारमा आजको छलफल सकारात्मक रहेको छ,’ उहाँले भन्नु भयो , ‘अब हामी विभिन्न चरणमा बस्छौं, कुराकानीहरु गर्छौं र मलाई विश्वास छ आजको छलफलले एउटा साझा धरातल निर्माण गरेको छ ।’
उहाँका अनुसार फागुन २८ गते अध्यक्ष केपी शर्मा ओली समूहले गरेको निर्णय स्थगन गर्नुपर्ने माग माधवकुमार नेपाल समूहले राखेको थियो ‘उहाँहरुले २८ गतेको बैठकमा हामी उपस्थित भएनौं । त्यसकारणले गर्दा त्यो बैठकका निर्णयहरुलाई कसरी स्वामित्व ग्रहण गर्ने, स्थगन गर्न सकिन्छ कि भनेर उहाँहरुले भन्नुभएको छ । हामीले अब अगाडि बढौं ती निर्णयहरुमा पुनरावलोकन गनुपर्ने छ, समीक्षा गर्नुपर्नेछ । केही कुराहरुमा थप सुधार गर्नुपर्ने छ भने त्यसमा छलफल गर्दै जान सकिन्छ । त्यसमा छलफल गर्दै जाऔं भन्ने आग्रह गरेका छौं’ ज्ञवालीले भन्नु भयो ।
दुबै पक्षले आ–आफ्ना कुरा राखेको भन्दै उहाँले भन्नु भयो हामी ठ्याक्कै निष्कर्षमा पुगिसकेका छैनौं । एउटै विन्दुमा पुगिसकेका छैनौं ।’ नेता ज्ञवालीले आफूहरुले माधव नेपाल पक्षलाई चैत ४ र ५ गते बोलाएको राष्ट्रिय कार्यकर्ता भेला स्थगन गर्न आग्रह गरेको सुनाउनु भयो ।
‘उहाँहरुले ४ र ५ गते राष्ट्रिय भेला गर्ने भन्नुभएको छ । त्यो भेलाले पार्टी एकतालाई बल पुर्याउँदैन । त्यसले थप दुरी बढाउने मात्रै काम गर्छ । त्यो भेलाहरु नगरौं । बरु अब केन्द्रीय कमिटीको बैठक आपसी परामर्शबाट तय गरौं भनेर कुराकानी गर्यौं’ नेता ज्ञवालीले भन्नु भयो ।
नेता ज्ञवालीले एमाले ब्युँताउने सर्वोच्च अदालतको फैसलालाई अवसरको रुपमा लिनुपर्ने पनि बताउनु भयो ।सर्वोच्च अदालतले नेकपा एमाले ब्युँताउने जुन फैसला गरेको छ यसलाई अवसरको रुपमा लिएर नेकपा एमालेलाई सुदृढ गर्दै लिएर लैजानुपर्छ । यहाँभित्र जे अन्तरविरोधहरु छन् ती अन्तरविरोधलाई छलफलको माध्यमबाट समाधान गर्दै जानुपर्छ’ उहाँले भन्नु भयो , ‘बलियो एमालेले मात्रै अरु बामपन्थीहरुलाई क्रमश पार्टी एकतामा जोड्दै सिंगो देशलाई नेतृत्व दिन सक्छ भन्ने कुरामा साझा अवधारणा निकालेका छौं ।’