लुम्बिनी प्रदेशका मुख्यमन्त्री शंकर पोखरेलविरुद्ध अविश्वास प्रस्ताव दर्ता
रुपन्देही-लुम्बिनी प्रदेशमा विपक्षी गठबन्धनले मुख्यमन्त्री शंकर पोखरेल विरुद्ध प्रदेशसभामा अविश्वास प्रस्ताव दर्ता गरेका छन् । अविश्वास प्रस्तावमा ३४ जना सांसदहरुको हस्ताक्षर छ ।
विगतमा मुख्यमन्त्री शंकर पोखरेलविरुद्ध अविश्वास प्रस्ताव दर्ता गरिएको तर उक्त प्रस्ताव प्रक्रियामा जानु अघि नै मुख्यमन्त्रीले राजीनामा दिएको भन्दै विपक्षी गठबन्धनले तत्कालीन प्रदेश प्रमुखबाट पुनः असंवैधानिक रुपमा पोखरेललाई नै मुख्यमन्त्री नियुक्त गरिएको आरोप लगाएका छन् ।
प्रदेशसभाका ३४ सदस्यले संविधानको धारा १८८ को उपधारा ४ र लुम्बिनी प्रदेशको प्रदेश सभा नियमावलीको १४४ को उपनियम १ बमोजिम मुख्यमन्त्रीविरुद्ध अविश्वास प्रस्ताव दर्ता गराएका हुन् । अविश्वास प्रस्ताव दर्ता गराउने क्रममा विपक्षी गठबन्धनले प्रस्तावित मुख्यमन्त्रीका रुपमा नेकपा माओवादी केन्द्रका संसदीय दलका नेता कूलप्रसाद केसीको नाम उल्लेख गरेका छन् ।
नेपाली काँग्रेसका प्रमुख सचेतक फखरुदीन खानले अविश्वास प्रस्ताव दर्ता गरिएको र आजै प्रदेश प्रमुखलाई भेटेर विशेष अधिवेशन आह्वानका लागि माग गर्ने बताउनुभयो ।
विपक्षी गठबन्धनका तर्फबाट सोमबार प्रदेश प्रमुख अमिक शेरचनसमक्ष लिखित निवेदन पेस गरिएको थियो, जसमा विपक्षी गठबन्धनले संविधानको धारा १६८ को उपधारा २ बमोजिमको सरकार गठनका लागि आह्वान गर्न माग गरिएको थियो । तर, संविधानतः प्रदेश प्रमुखबाट त्यसरी सोझै सरकार गठनका लागि आह्वान गर्न नमिल्ने भएका कारण विपक्षी गठबन्धनले प्रदेशसभामा सरकारमाथि अविश्वासको प्रस्ताव पारित गराएर निकास खोज्ने बाटो अवलम्बन गर्न थालेको हो ।
