कैलालीमा सत्ता गठबन्धनको चुनावी तालमेलमा कुरा मिलेन
धनगढी – वैशाख ३० गते हुने स्थानीय तहको निर्वाचनमा कैलालीको वडा तहसम्मै तालमेल गर्ने विषयमा छलफल गर्न बसेको सत्तारुढ गठबन्धनको बैठक विनानिष्कर्ष सकिएको छ ।
मंगलबार धनगढीस्थित नेकपा एकीकृत समाजवादी पार्टीको संसदीय दलको कार्यालयमा बसेको नेपाली कांग्रेस, माओवादी केन्द्र, एकीकृत समाजवादी पार्टी, राष्ट्रिय जनता पार्टी र राष्ट्रिय जनमोर्चा पार्टीको बैठक विना निष्कर्ष सकिएको नेताहरुले बताएका छन् ।
बैठकमा सहभागी नेकपा माओवादी केन्द्रका कैलाली संयोजक लाजुुराम चौधरीले अगामी निर्वाचनमा वडा स्तरसम्मै गठबन्धन गर्ने विषयमा छलफल भएपनि ठोस निर्णय हुन नसकेको बताए । ‘वडा तहसम्मै तालमेल गर्ने विषयमा छलफल र निर्णय गर्न बसेको सत्तारुढ गठबन्धनको बैठक बिनानिष्कर्ष सकिएको छ,’ चौधरीले अनलाइनखबरसँग भने, ‘सबै पार्टीले आन्तरिक छलफल गरेर मात्र आवश्यक निर्णय लिने सैद्धान्तिक सहमति भएको छ ।’
यो पनि पढ्नुहोस
निर्वाचनमा गठबन्धन हुन्छ, म कैलाली ५ बाट लड्छु : आरजु राणा
बैठकमा सहभागी नेपाली कांग्रेस कैलालीका सभापति नारायणदत्त भट्टले पनि वडा तहसम्म गठबन्धन गर्ने विषयमा कुराकानी भएपनि कुनै पनि निर्णय हुन नसकेको जानकारी दिए । उनका अनुसार गठबन्धनमा आवद्ध सबै राजनीतिक दलले आन्तरिक छलफल र विश्लेषण गरेपछि मात्र आवश्यक निर्णय लिइनेछ । अब गठबन्धनको अर्को बैठक चैत २३ गते फेरि बस्ने सैद्धान्तिक सहमति भएको छ ।
मंगलबारको बैठकमा एकीकृत समाजवादी पार्टी सुदूरपश्चिम संसदीय दलका नेता तथा भौतिक पूर्वाधार विकास मन्त्री दीर्घ सोडारी, माओवादी केन्द्र सुदूरपश्चिम प्रदेशका अध्यक्ष हरिराम चौधरी, कैलाली इन्चार्ज हरि ज्ञवाली अखण्ड, कैलाली संयोजक लाजुराम चौधरी, नेपाली कांग्रेस कैलालीका सभापति नारायणदत्त भट्ट राजपाका गयाप्रसाद चौधरी र जनमोर्चाका नेता नन्दराज भट्ट लगायतको सहभागिता थियो ।
