धर्ममाथि गर्ने शासन अन्त्य भएको छ : प्रमुख दाहाल
चितवन- भरतपुर महानगरपालिकाका प्रमुख रेनु दाहालले एक धर्मले अर्को धर्ममाथि गर्ने शासनको अन्त्य भएको बताउनुभएको छ । ईदुल अज्हा बकरइद २०७९ को अवसरमा आइतबार भरतपुर –१६ जामिया रौयद आबुल हसन आली नढबीले आयोजना गरको शुभकामना आदानप्रदान कार्यक्रममा मेयर दाहालले यस्तो बताउनुभयो ।
विगतमा धर्म मान्ने जनसंख्याको आधारमा न्युन जनसंख्या भएका धर्मावलम्बीलाई शासन गर्ने परिपाटी भएपनि अहिले त्यो अन्त्य भएको चर्चा गर्नुभयो । यो सबै परिवर्तन जनयुद्धको जगमा स्थापना भएको संघीय गणतन्त्रको सुन्दर पक्ष रहेको मेयर दाहालले दाबी गर्नुभयो । नेपाललाई धर्मनिरपेक्ष राष्ट्र घोषणा गरेसँगै सबै धर्मालम्बीहरुबीच धार्मिक सहिष्णुता कामय भई भाइचाराको सम्बन्ध स्थापित भएको उहाँको भनाइ ।
यहाँ धर्मको आधारमा सानो ठूलो कोही छैन, उहाँले भन्नुभयो, सबै धर्म मान्नेहरु समान हुन् । के हिन्दु, के बौद्ध, के मुस्लिम, के ईसाई ? सबै धर्मले दिने सन्देश एउटै हो ।’ भरतपुर महानगरपालिकाले मुस्लिम समुदायको अध्ययन र पुजापाठका लागि मदरसा र मस्जिद निर्माणका लागि वर्षेनी बजेट विनियोजन गर्दै आइरहेको मेयर दाहालले बताउनुभयो ।
नेपाल बहुल भाषा, संस्कृति, धर्मको अनुपम स्थल हो, सबैले आफ्नो भाषा, संस्कृति, रीतिरिवाज स्वतन्त्र ढङ्गबाट मान्न पाउनुपर्ने उहाँले चर्चा गर्नुभयो ।
