महरालाई थप ३ दिन थुनामा राख्न जिल्ला अदालतको अनुमति
काठमाडौं । निवर्तमान सभामुख कृष्णबहादुर महरालाई थप तीन दिन हिरासतमा राख्न अदालतले अनुमति दिएको छ । जिल्ला अदालत काठमाडौंले महरालाई थप तीन दिन हिरासतमा राखेर अनुसन्धान गर्न प्रहरीलाई अनुमति दिएको हो ।
मंगलबार प्रहरीले महरालाई अदालत पेश गरेको थियो । जिल्ला सरकारी वकिलको कार्यालयमा लगिएपछि महरालाई अदालतमा पेश गरिएको थियो ।
काठमाडौं जिल्ला अदालतका न्यायाधीश दीपककुमार दाहालको एकल इजलासले महरालाई थप तीन दिन हिरासतमा राख्न अनुमति दिएको हो ।
सरकारी वकिलका तर्फबाट बहस गर्दै अधिवक्ता उमाकान्त पौडेलले महरालाई १३ दिन हिरासतमै राखेर अनुसन्धान गर्न म्याद थप गर्न माग गरेका थिए ।
महराका तर्फबाट पूर्वमहान्यायाधिवक्ता रमण श्रेष्ठ र अधिवक्ता मुरारी सापकोटाले बहस गरेका थिए ।