खनाल-नेपाल राष्ट्रपतिको सर्वदलीय बैठकमा नजाने
काठमाडौं-राष्ट्रपति विद्यादेवी भण्डारीले आज ४ बजेका लागि बोलाएको सर्वदलीय बैठकमा नेकपा एमालेका वरिष्ठ नेताद्वय झलनाथ खनाल र माधवकुमार नेपाल सहभागी नहुने भएका छन् ।
भोलि र पर्सिका लागि आयोजना गरिएको खनाल-नेपाल पक्षको भेलाको तयारीका लागि व्यस्त हुने भएकाले राष्ट्रपतिले बोलाएको सर्वदलीय बैठकमा सहभागी हुन नसक्ने केन्द्रीय सदस्य विष्णु रिजालले जानकारी दिए । ‘पार्टीको भोलिको भेलाका लागि व्यस्त हुने भइयो । भेलाका लागि दस्तावेजहरु लेख्नुपर्ने भएकाले व्यस्त हुनुपर्ने भयो ।
त्यसैले आजको सर्वदलीय बैठकमा सहभागी हुन नसक्ने भयौं । यो कुरा हामीले राष्ट्रपति कार्यालयलाई जानकारी गराइसकेका छौं ।’
