माधव नेपालनिकट लुम्बिनीका सांसद तत्काल एमाले समाजवादीमा नजाने
बुटवल-लुम्बिनी प्रदेश सभामा रहेका नेकपा एमालेका सांसदहरू माधवकुमार नेपालले खोलेको नयाँ दल नेकपा एमाले समाजवादीमा तत्काल नजाने भएका छन्।यसअघि नेता नेपाल पक्षमा रहेका प्रदेश सभा सदस्य विष्णु पन्थी र रमा घर्ती अहिले पर्ख र हेरको अवस्थामा रहनुभएको छ । प्रदेश र स्थानीय तहका जनप्रतिनिधिले २१ दिनभित्र दल रोज्न पाउने गरी राजनीतिक दल सम्बन्धी अध्यादेश आएको छ।
तर लुम्बिनीका सांसदहरूले तत्काल दल परिवर्तन गर्ने अवस्था देखा परेको छैन। कपिलवस्तुको निर्वाचन क्षेत्र नम्बर १ को (क) बाट निर्वाचित सांसद पन्थी २०७० देखि नै नेपाल पक्षमा हुनुन्छ । तर उहाँ पार्टी विभाजनको पक्षमा आफू नरहेको बताइरहनुभएको छ ।
‘म पार्टी विभाजनको पक्षमा छैन,’ उहाँले भन्नुभयो ‘कपिलवस्तुमा समानान्तर समिति अध्यक्ष भएर पनि काम गरेको हुँ। नेता नेपालले राखेका भेलामा पनि काठमाडौंमा म सहभागी थिएँ। तर म पार्टी विभाजनको पक्षमा छैन।’
उहााले एमालेभित्रै रहेर १० बुँदे सहमति कार्यान्वयन गर्न पहल गरिराख्ने बताउनुभयो । उहाँले आफूहरू विभाजन गर्ने पक्षधर नभएको बताउनुभएको छ । कार्यदलले बनाएको १० बुँदे कार्यान्वयन भए एमालेमै बस्ने उहाँले बताउनुभयो ।
अर्का सांसद रमा घर्तीले आफू विभाजनको पक्षमा नरहेको बताउनुभएको छ ।‘म पार्टी विभाजनको पक्षमा छैन। जनताका लागि राजनीतिक गरेकोले मुलधारको पार्टी र सूर्य चिन्ह छाड्न सक्दिनँ,’ उहाँले भन्नुभयो ।
उहाँले नेता नेपालले पार्टी दर्ता गर्न निवेदन दिए पनि अझै सहमति हुन सक्ने भन्दै केही दिन हेर्ने बताउनुभयो । ‘नयाँ दल दर्ता गरे पनि पार्टी एकता हुनेमा म विश्वस्त छु,’ उहाँले भन्नुभयो ।उहाँ पाल्पाबाट समानुपातिकतर्फ निर्वाचित हुनुभएको हो ।पन्थी र घर्ती नै पार्टी विभाजनको विपक्षमा रहेपछि नेता नेपालले नेतृत्व गरेको एमाले समाजवादीमा लुम्बिनीमा एक जना पनि सांसद नहुने अवस्था देखिएको छ।