पार्टी श्रृंखलाबद्ध हमलाको शिकार भयो: ओली
काठमाडौँ — एमाले अध्यक्ष केपी शर्मा ओलीले तत्कालिन अवस्था सरकार ढल्ने अवस्था आउने भएकाले माओवादी केन्द्रसँग पार्टी एकता गरेको बताउनु भएको छ । एमालेको १० औं महाधिवेशनको बन्दसत्रलाई शनिबार सम्बोधन गर्दै अध्यक्ष ओलीले पार्टीका नीति र योजना कार्यान्वयनका लागि आफूहरू मिलेको बताउनु भयो ।
तर सरकार बनाएको र पार्टी एकता गरेकै दिनबाट षड्यन्त्र भएको उहाँले उल्लेख गर्नु भयो । ‘कम्युनिष्ट आन्दोलन रक्षात्मक रुपमा गइरहेका बेला कम्युनिष्ट पार्टीले जनमत पाएको थियो तर सुरुकै दिनबाट षड्यन्त्र सुरु गरे’ उहाँले भन्नु भयो हामीमाथि अनेक प्रहार भए । हाम्रो भित्रका अनेक व्यक्तिहरूलाई भड्काउने क्रियाकलाप भए । हाम्रो पार्टी श्रृंखलाबद्ध हमलाको क्रमश शिकार हुदै गयो । पार्टी विभाजन गराइयो । एकीकृत भइरहेका नेताहरू आफैसंलग्न भएर पार्टीभित्र विभाजनका क्रियाकलापमा लागे र पार्टी दुईपल्ट विभाजन भयो ।’