आइपिएलः बेंगलोरले मुम्बईलाई हरायो
एजेन्सी – इन्डियन प्रिमियर लिग (आइपिएल)मा रोयल च्यालेन्जर्स बेंगलोरले साविक विजेता मुम्बई इन्डियन्सलाई पराजित गरेको छ । अलराउन्डर ग्लेन म्याक्सवेलको सानदार प्रदर्शन र तीव्र गतिका बलर हर्षल पटेलको ह्याट्रिक प्रेरित बेंगलोरले मुम्बईलाई ५४ रनले पराजित गरेको हो । जितको लागि १ सय ६६ रनको लक्ष्य पछ्याएको मुम्बई १८.१ ओभरमा १ सय ११ रनमा अल आउट हुन पुग्यो ।
मुम्बईका ओपनर रोहित शर्माले २८ बलमा ५ चौका र १ छक्का सहित सर्वाधिक ४३ रन जोडे । क्विन्टन डि कक २३ बलमा ४ चौका सहित २४ रनमा आउट भए । मुम्बईका अन्य खेलाडीले दोहोरो अंकमा रन जोड्न सकेनन् । बेंंगलोरका हर्षल पटेलले ३.१ ओभरमा १७ रन खर्चेर ४ विकेट लिए । यस्तै ग्लेन म्याक्सवेलले ४ ओभरमा २३ रन खर्चेर २ विकेट लिए भने युजभेन्द्र चहलले ४ ओभरमा १ मेडन सहित ११ रन खर्चेर ३ विकेट लिए । मोहम्मद शिराजले पनि एक विकेट लिन सफल रहे ।
सअघि दुबईमा टस हारेर ब्याटिङमा उत्रिएको बेंगलोरले निर्धारित २० ओभरमा ६ विकेट गुमाउँदै १ सय ६५ रन बनाएको थियो । विराट कोहलीले ४२ बलमा ३ चौका र ३ छक्का सहित ५१ रनको अर्धशतकीय पारी खेले । ग्लेन म्याक्सवेलले ३७ बलमा ६ चौका र ३ छक्का सहित ५६ रनको योगदानी दिँदै अर्धशतकीय पारी खेले । यस्तै सिकर भरतले २४ बलमा २ चौका र २ छक्का सहित ३२ रन जोडे । मुम्बईका जस्प्रित बुमराहले ४ ओभरमा ३६ रन खर्चेर ३ विकेट लिए । ट्रेन्ट बोल्ट, एडम मिल्ने र राहुल चाहरले एक एक विकेट लिए । आजको खेलः सनराइजर्स हैदराबाद भर्सेस राजस्थान रोयल्स, ७ः४५ बजे