स्थानीय चुनावको मतलाई सिट बाँडफाँटको मुख्य आधार बनाउन कांग्रेसमा सुझाव
मंसिरमा हुने प्रतिनिधि सभा र प्रदेश सभा चुनावमा गठबन्धन गर्ने औपचारिक निर्णय गरेको तीन दिनपछि नेपाली कांग्रेसका शीर्ष नेताहरूले आज आन्तरिक छलफल गरेका छन्।
सिट बाँडफाँटका आधार के हुने भन्नेमा कांग्रेसका पदाधिकारी र पूर्वपदाधिकारी सोमबार बालुवाटारमा करिब दुई घन्टा छलफल भएको थियो ।
साउन २० मा सत्ता गठबन्धनले सिट बाँडफाँट गर्न ११ सदस्यीय कार्यदल गठन गरेका थिए, जसमा कांग्रेसका तीन सदस्य छन्।महामन्त्री गगन थापा, नेताहरू कृष्णप्रसाद सिटौला र ज्ञानेन्द्रबहादुर कार्की सिट बाँडफाँट कार्यदलमा सदस्य रहेका छन् ।
यो कार्यदलको पहिलो बैठक सोमबार अपरान्ह ३ बजे बालुवाटारमा बस्दैछ। यो बैठकमा जानुअघि पार्टीभित्र सामूहिक धारणा बनाउन सभापतिसमेत रहेका प्रधानमन्त्री शेरबहादुर देउवाले आज शीर्ष नेताहरूसँग सुझाव लिनु भएको हो ।
पार्टी प्रवक्ता प्रकाशशरण महतले कार्यदलका तीन सदस्यलाई पार्टीका नेताहरूले सुझाव दिएको बताए । तालमेललाई कसरी अगाडि बढाउने भन्नेबारे नेताहरूले कार्यदल सदस्यहरूलाई सुझाव दिनुभएको छ उनले बालुवाटारमा पत्रकारहरूसँग भने चुनावी तालमेल र सिट बाँडफाँटबारे पदाधिकारी तथा पूर्वपदाधिकारीले आ-आफ्ना सुझाव जनाउनु भएको थियो।
महतका अनुसार अधिकांश नेताहरूले सिट बाँडफाँटको आधार मतलाई बनाउन सुझाव दिएका छन्। २०७४ को स्थानीय तह, प्रतिनिधि सभा र प्रदेश सभामा दलहरूलाई प्राप्त मत र गत वैशाखको स्थानीय तह निर्वाचनमा प्राप्त मतलाई आधार बनाउनुपर्ने सुझाव कार्यदल सदस्यहरूलाई कांग्रेसका शीर्ष नेताले दिनु भएका छन् ।
बैठकमा सहभागी सहमहामन्त्री जीवन परियारले प्रतिनिधि सभा र प्रदेश सभामा कति सिट लिने भन्नेबारे आज कुराकानी भएन। तर सिट बाँडफाँट आधारबारे भने कुराकानी भएको छ। कांग्रेसले यति सिट लिनुपर्छ भन्ने ढंगले कुराकानी भएन। गठबन्धन गर्ने निर्णय भएकोले गठबन्धनका उम्मेदवार सबैले जित्ने आधार तय गरेर जानुपर्छ भन्ने कुरा उठेको छ उनले बताए।
उनले सिट बाँडफाँट कार्यदलमा रहेका पार्टीका नेताहरूलाई सुझाव दिइएको पनि बताए । वैज्ञानिक, व्यवहारिक, व्यवस्थित तरिकाले सिट बाँडफाँट हुनुपर्छ भन्ने छ। २०७४ को निर्वाचन र गत वैशाखको स्थानीय निर्वाचन हेरेर गठबन्धनकै दलका उम्मेदवारले जित्ने गरी सिट बाँडफाँट गर्नुपर्छ भन्ने सुझाव आएका छन् उनले भन्नु भएको थियो ।
प्रतिनिधि सभाका प्रत्यक्षतर्फका १६५ क्षेत्रमध्ये करिब सय सिट आफूहरूले लिनुपर्ने कांग्रेसका नेताहरूले बताउँदै आईरहेका छन् ।