राष्ट्रिय सभा निर्वाचनः आजदेखि मौन अवधि, प्रचारप्रसार गर्न नपाइने
काठमाडौँ । निर्वाचन आयोगले राष्ट्रियसभाको निर्वाचनअन्तर्गत आजदेखि मतदानकार्य समाप्त नहुञ्जेलसम्म प्रचारप्रसार निषेधको अवधि कायम गरेको छ ।
निर्वाचन आयोगका अनुसार गएराति १२ बजेबाट मतदान नसकिँदासम्म मौन अवधि लागू हुनेछ । १९ सदस्यका लागि यही फागुन ११ गते हुने निर्वाचनको लागि मौन अवधी सुरु भएको हो ।
मौन अवधीमा राजनीतिक दलका पदाधिकारी, उम्मेदवार, दलका भ्रातृसङ्गठन तथा आचारसंहिता पालना गर्नुपर्ने अन्य व्यक्ति, संस्था वा निकायले निर्वाचन प्रचारप्रसारलगायत कुनै पनि प्रकारका छलफल, अन्तर्क्रिया, सभा सम्मेलन, कार्यशाला गोष्ठी गर्न पाइने छैन ।
मौन अवधिमा कुनै पनि विधि, प्रक्रिया वा माध्यमबाट मत माग्न र निर्वाचन प्रचारप्रसार गर्न नहुने, सामाजिक सञ्जाल, अनलाइन, छापा वा अन्य कुनै माध्यमबाट राजनीतिक दल वा उम्मेदवारको पक्ष वा विपक्षमा कुनै सन्देश, सूचना वा प्रचारप्रसारका सामग्री पोस्ट वा शेयर गर्न वा गराउन नहुने भएकाले सोबमोजिम आचरण पालना गर्न गराउन आयोगका प्रवक्ता शालिग्राम शर्मा पौडेलले अनुरोध गर्नु भएको छ ।
राष्ट्रियसभाका १९ सदस्यको पद आगामी फागुन २१ गतेदेखि सकिँदैछ त्यसको एक महिनाअघि निर्वाचन गरिनुपर्ने कानुनी व्यवस्था अनुसार फागुन ११ मा निर्वाचन हुदै छ ।
