नेटवर्किङ ब्यबसाय युनिटि लाइफमा संलग्न ११ जना पक्राउ

भुपाल थापा, कपिलबस्तु असार ३१,

युनिटि नेटवर्किंगमा संलग्न ११ जनालाई कपिलबस्तु प्रहरीले पक्राउ गरेको छ । युनिटि लाइफ नामक संस्थामार्फत नेटवर्किङ ब्यबसाय गरि ठगी गर्ने उनीहरुलाई कपिलबस्तु प्रहरीले पक्राउ गरि मंगलबार सार्वजनिक गरेको छ । ठगि गरिरहेको भन्ने उजुरीका आधारमा कपिलबस्तु प्रहरीले उनीहरुलाई पक्राउ गरेको हो ।

मंगलबार प्रहरीले उनीहरुलाई नियन्त्रणमा लिई गम्भीर छानबिनका लागि अनुसन्धान अगाडि बढाइएको हो । पक्राउ पर्नेमा दैलेख जिल्ला नौमुले गाउपालिका ७ का कर्ण सलामी मगर, पश्चिम नवरपरासी जिल्ला सुनवल नगरपालिका २ का अशोक धरिकारी, झापा जिल्ला दमक नगरपालिका ३ का खगेन्द्र निरौला, सप्तरी जिल्ला राजबिराज नगरपालिका १ का मिथलेश यादव, सोहि स्थानका मन्जुला राई रहेका छन् । यस्तै रौतहट जिल्ला चन्द्रपुर नगरपालिका ११ का मुकेश राउत, बाँके जिल्ला कोहलपुर नगरपालिका ३ का हेमराज थापा, रामेछाप जिल्ला मन्थली नगरपालिका १ का सुभाष बस्नेत र धादिङ जिल्ला सिद्धिलेखा गाउपालिका २ का दिपा पुरी रहेकी छिन् ।

इलाका प्रहरी कार्यालय कृष्णनगरका प्रहरी निरिक्षक प्रताप पौडेलको कमाण्डमा बिगत दुइ हप्तादेखिको गोप्य अप्रेसन अनुसार उनीहरुलाई पक्राउ गर्न सफल भएको हो । प्रहरीले पत्रकार सम्मेलन मार्फत सिआइबीको समन्वयमा युनिटी नेटवर्किङमा संलग्न धादिङका रंजन लामा, दार्चुलाका भुपेन्द्र धामी, रौतहटका अमित कुमार चौधरी, गोरखाका सुसिल बिक, मकवानपुरका अभिराज तामाङ र भारत घर भएका सर्भिस पाण्डेलाई पक्राउ गरिने समेत कपिलबस्तुका प्रहरी उपरिक्षक दिप शमसेर जवराले बताए ।

पक्राउ परेकाहरु १८ देखि ३० बर्ष उमेरसम्मका रहेका छन् । पिरामिड शैलीमा सदस्य बनाउँदै ठगी गर्न यस्तो व्यवसाय नेपालमा गरिँदै आएकोमा कानुनतः त्यस्तो गर्नु अवैध हो । सदस्यताको लागि ठूलो रकम लिने र सदस्य बनेपछि एकले अर्कोलाई सदस्य बनाउँदै यस्तो व्यवसाय फैलाइन्छ । जिल्लामा डी एक्स एन र भिस्टेज नामक कम्पनि ले पनि पिरामिड शैलीमा सदस्य बनाउँदै आएका छन् । ति कम्पनीले क्यान्सरको समेत उपचार हुने भन्दै उत्पादन बिक्रि गर्ने गरेका छन् ।