संसदमा विश्वासको मत लिँदै प्रधानमन्त्री
काठमाडौँ — प्रधानमन्त्री पुष्पकमल दाहालले फागुन ३० मा संसदमा विश्वासको मत लिने हुनुभएको छ ।
नयाँ सत्ता सकिकरण भएसंगै काँग्रेसले दिएको समर्थन फिर्ता गरेकोले प्रधानमन्त्रीले बिश्वासको मत लिनको लागि तयारीमा लाग्नुभएको हो । १४ महिनायता तेस्रो पटक प्रधानमन्त्रीले विश्वासको मत लिदै हुनुहुुन्छ । यसअघि पहिलो पटक गत वर्षको पुस २६ गते र चैत ६ मा दोस्रो पटक दाहालले विश्वासको मत लिनु परेको थियो ।
विश्वासको मतका लागि दाहालले माओवादी केन्द्रको संसदीय दलबाट ह्विप जारी गर्ने निर्णय गराएका छन् भने सत्ता साझेदार दलहरूसँग छलफल तीव्र पारेका छन् ।
विश्वासको मत लिएपछि मात्रै सदनमा महत्त्वपूर्ण विधेयक अगाडि बढाउने र प्रतिनिधिसभामा पेस भएको आगामी आर्थिक वर्षको बजेटका सिद्धान्त र प्राथमिकता (प्रि–बजेट) माथि छलफल हुने छ ।
प्रधानमन्त्रीले प्रतिनिधित्व गर्ने दल विभाजित भएमा वा सरकारमा सहभागी दलले आफ्नो समर्थन फिर्ता लिएमा ३० दिनभित्र प्रधानमन्त्रीले विश्वासको मतका लागि प्रतिनिधिसभासमक्ष प्रस्ताव राख्नुपर्ने सबैधानिक व्यवस्था छ ।
प्रधानमन्त्री दाहाललाई एमाले, माओवादी, रास्वपा, जसपा, एकीकृत समाजवादी र स्वतन्त्र सांसद अमरेशकुमार सिंहसमेतले बिश्वासको मत दिने तयारी देखिन्छ । यसरी प्रधानमन्त्रीको पक्षमा अहिलेसम्मको स्थिती हेर्दा १ सय ५३ सांसद देखिएका छन् ।
बिपक्षमा कांग्रेससँगै राप्रपा, जनमत, लोसपा, नागरिक उन्मुक्ति, जनमोर्चा, नेमकिपा, आमजनता पार्टी गरी ११९ सांसद छन् ।
